Berriak

Kirola

TENTSIOZ BETETAKO EGUNA EUSKAL PILOTA SELEKZIOARENTZAT MUNDUKO POTENTZIA HANDIEN AURREAN

Bost partida, ahalegin gorena eta lan bikaina Frantzia, Espainia eta Mexikoren aurka, finalerdietarako bidea marrazten duen jardunaldi gogor batean.

🔹 Eskuz Banaka – Porrot duin bat txapelketako faborito nagusiaren aurka

Trinketeko 23 urtez azpiko Munduko Txapelketako hirugarren jardunaldia goi-mailako norgehiagoka batekin abiatu da Eskuz Banaka modalitatean. Euskal Pilota Selekzioa ordezkatzeko Jon Jara aritu da kantxan, aurrean Mariluz frantziarra izan duelarik, Iparraldeko pilotari profesionala eta goi-mailako zirkuituan guztiz finkatua dagoena.

Erronka handiaren aurrean batere beldurrik gabe, Jon Jarak ausardiaz ekin dio partiduari, jakinda galtzeko ezer ez zuela. Tanto bakoitza gogotik borrokatu du, baina Mariluzek, batez ere bolea eta boti-boleako jokaldietan, erakutsitako nagusitasunak erabaki du lehen seta, frantziarraren aldeko 15-06ko markagailuarekin amaituz.

Bigarren setean, hautatzaileak, Eneko Uribek, aldaketa taktiko bat egitea erabaki du eta Unax Manterola sartu du kantxan, aurkaria desorekatzeko helburuarekin. Manterola indartsu atera da, intentsitatez eta seriotasunez jokatuz lehen tantotik bertatik. Set osoan lehiakor aritu bada ere, Mariluzek beti eutsi dio gutxieneko abantailari, eta 15-08ko emaitzarekin itxi du bigarren seta.

Porrotak porrot, Jararen eta Manterolaren lana meritu handikoa izan da. Izaera, konpromisoa eta lehen mailako pilotari profesional baten aurka lehiatzeko gaitasuna erakutsi dute. Partida honetan pilatutako ikaskuntza funtsezkoa izango da txapelketan hazten jarraitzeko.

🔹 Paleta Goma Emakumezkoak – Ahalegin handia Mexiko indartsu baten aurrean eta polemikak markatutako amaiera

Eskuz Banakako partidaren ondoren, Euskal Pilota Selekzioak jarraipena eman dio bere parte-hartzeari Trinketeko 23 urtez azpiko Munduko Txapelketaren hirugarren jardunaldian, oraingoan Paleta Goma Emakumezkoen modalitatean, aurrean Mexiko izanik, espezialitate honetan ibilbide eta esperientzia handiko selekzioa.

Oraingoan, hautatzaileak, Iñaki Mutuberriak, bestelako bikote batekin jokatzearen alde egin du, Enara Mazizior atzelari gisa kantxaratuz eta aurrelari lanean Zulaika ahizpa nagusia, Olatz, bere ondoan kokatuz. Aurrean, Mexikok Monserrat–Ayala bikotearekin hasi du partida, baina bigarren setean erabakigarria izan den aldaketa egin dute: Guzmán atzelariaren sarrera.

Lehen seta ezusteko atsegina izan da. Euskal pilotariek konfiantzaz eta asmatuz jokatu dute hasieratik. Maziziorrek sendo eutsi dio atzealdeari, eta Zulaikak bikain jardun du sakean eta errematean. Bikotearen joko zuzen eta oldarkorrak Mexikoko jokalariak desorekatu ditu, eta seta sendo itxi dute: 15-10, zaleen artean oso sentsazio onak utziz.

Bigarren setean, Mexikoko hautatzaileak bere atzelari onena, Guzmán, kantxaratzea erabaki du, eta horrek erabat aldatu du partidaren erritmoa. Guzmánek erakutsitako indarrak eta kontrolak joko maila oso altua ezarri du, eta gureek ahaleginak egin dituzten arren, ez dute arrakastarik lortu. Borroka gogor baten ondoren, seta 5-15 amaitu da Mexikoren alde.

Dena hirugarren eta azken set erabakigarrian zegoen jokoan, tentsioa eta esfortzua maila gorenean izan direlarik. Euskadik bere onena ematera atera da, estrategia argi batekin: hutsegiteak saihestu eta pilota aurkariaren aurrelariaren gainera bideratu. Emaitza ezinhobea izan da eta 6-5 jarri dira aurretik. Hala ere, une horretan, Mexikoko atzelariak, Guzmánek, orkatilako luxazio bat jasan duela zirudien, eta partidua lesio kasuetan baimendutako 10 minutuz eten behar izan da.

Mexikok baimendutako aldaketa bakarra egina zuenez, ezin izango zuten jarraitu. Guzman, nabarmenki minduta, bazirudien ez zegoela jarraitzeko moduan. Hala ere, denbora agortu ondoren, erabat berreskuratuta itzuli da kantxara, eta horrek nolabaiteko harridura eta sinesgaiztasuna sortu du euskal selekzioan. Geldialdi horren ondoren, jokoaren erritmoa izugarri aldatu da. Mexikarrek gureen momentuko deskonexioa aprobetxatu dute eta azkar hartu dute abantaila, 6-9 erabakigarrira iritsiz.

Euskadik azken tantoetan ausardiaz erantzun duen arren, beranduegi izan da. Hirugarren seta 6-10 bukatu da, eta horrek garaipenetik kanpo utzi du bikote euskalduna, aurrerapauso nabarmena erakutsi arren. Kontuan izanik biak esker hormako gomazko paletan trebatuak daudela eta trinketean denbora gutxi daramatela, egindako lana oso esanguratsua da.

💡 Ondorioa

Porrotaren gainetik, Maziziorrek eta Zulaikak argi utzi dute entrenamendu gehiago eta espezializazioarekin, munduko potentzia handien aurka lehiatzeko gaitasuna dutela. Esperientzia honen ikaskuntza da balio nagusiena, eta gaur erakutsitako jarrerak taldearen hazkundea sendotu egiten du.

🔹 Eskuz Binaka – Mexikoren aurkako porrota taldeko lehen postua erabakitzeko lehian

Euskal Pilota Selekzioaren eguneko hirugarren partida Eskuz Binakako modalitatean jokatu da, eta taldeko lehen postua jokoan zegoen norgehiagoka erabakigarria izan da, Mexikoko selekzio indartsuaren aurka.

Euskadiren aldetik, Unax Manterola atera da aurrelari gisa, eta Eneko Sorondo atzelari postuan. Aurrean, Fernando Medina eta Donovan Medina pilotariek osatutako bikote mexikarra izan dute eta hauek, hasieratik joko serio eta sendoa planteatu dute. 

Lehen seta parekatuta hasi da. Bi bikoteek tantoak elkarri erantzunez jokatu dute, eta 5-5 berdinketara iritsi dira. Une horretan, mexikarrek aurrerapausua eman dute beste maila bateko erritmoa ezarriz. Hortik aurrera, Fernando Medinak kontrola hartu du, bere taldekideak ondo babestutako joko bikain eta erabakigarriarekin. Bikote euskaldunak, aldiz, ez du lortu jokoan sartzea, eta ez du bere mailarik onena eman. Horrela, lehen seta argi erori da mexikarren alde: 15-6.

Atsedenaldiaren ostean, eta Eneko Uribe hautatzailearen zuzenketa taktikoekin, bikote euskaldunak beste jarrera bat erakutsi du. 0-5 atzetik hasi arren, erreakzionatzen jakin dute, eta 5-5era berdintzea lortu dute, nortasuna eta anbizioa erakutsiz. Hala ere, animoaren bultzadak setaren ibilbidea alda zezakeela zirudienean, aurrelari mexikarra berriro nabarmendu da, tanto erabakigarriak eginez eta norgehiagoka beraien alde desorekatu du. Azkenean, Mexikok bigarren seta ere 15-6 irabazi du, eta taldeko lehen postua ziurtatu du.

💡 Ondorioa

Porrota argia izan bada ere, Manterolak eta Sorondok joko oneko uneak eta jarrera lehiakorra erakutsi dute. Lehen postua lortu ez badute ere, finalerdietarako sailkapena dagoeneko eskuratua dute, eta munduko txapelketa honetako domina lortzeko helburua indarrean jarraitzen du. Pilotariek konfiantza dute hurrengo egunetan bere mailarik onena berreskuratuko dutela, eta fase erabakigarrira baldintza onenetan iritsiko direla. 

🔹 Paleta Larruz – Multzoko lidergoa lortzeko lehia garrantzitsuan porrota, Espainiako selekzio sendo baten aurka

Euskal Pilota Selekzioaren eguneko laugarren partida Larruzko Paleta modalitate exijentean jokatu da, tentsio handiko partidu batean, Espainiako selekzioaren aurka, Indurain eta Perez Galbetek osatutako bikote nafarrak ordezkatuta. Euskadiren aldetik, Endika Garciak eta Markel Sierrak errepikatu egin dute kantxan, aurreko egunean Frantziaren aurka lortutako garaipen bikainaren ostean.

Norgehiagokak osagai estrategiko garrantzitsua zuen: multzoko lidergoa jokoan zegoen, eta horrek abantaila garrantzitsua ematen zuen finalerdietako bidegurutzeari begira. Bi taldeak partidurik galdu gabe iristen ziren, sentsazio onekin eta tanto bakoitzak aldea markatu zezakeela jakinda.

Lehen seta parekatua izan da hasieran. Euskadik lehiakortasun maila ona erakutsi du, baina aurreko eguneko nekea eta desgaste fisiko-mentala nabaritzen hasi dira. Espainiako bikoteak, oso ondo antolatuta eta ia hutsegiterik gabe, seteko une garrantzitsuenak hobeto kudeatu ditu, eta 15-9 irabazi du sendotasunez.

Bigarren setean, Garcíak eta Sierrak aurrerapausoa eman dute. Sentsazio hobeak izan dituzte eta intentsitate handiz aritu dira 10eko berdinketa arte. Baina une horretan, Espainiako bikoteak alde txiki bat ireki du, jokoan asmatuz eta defentsa sendoaz baliatuta. Nahiz eta gureek azken ahalegina egin, bigarren seta ere espainiarren aldekoa izan da: 15-10.

💡 Ondorioa

Porrotaren gainetik, euskal bikoteak lehiakortasuna eta nortasuna erakutsi du berriz ere, eta hainbat unetan aurkari sendo baten aurrean parez pare aritu dira. Taldeak bere horretan jarraitzen du azken fasean, eta esperientzia hau, zalantzarik gabe, baliagarria izango da parekatuak eta exijenteak izango diren finalerdietarako.

🔹 Xare – Maila handia eta porrot estua Frantzia boteretsuaren aurka

Euskal Pilota Selekzioaren eguneko azken partida Xare modalitate ikusgarrian jokatu da, txapelketa irabazteko faboritoa den Frantziako selekzioaren aurka, Telletxea eta Castera Iparraldeko pilotariek ordezkatuta.

Euskadiren aldetik, Xuban Lopetegi eta Markel Mujika izan dira kantxan, eta orain arteko txapelketako emanaldi ikusgarrienetako bat eskaini dute.

Lehen seta biziki lehiatua izan da, bi bikoteen artean kalitate handiko jokaldiak ikusita. Frantzia 11-7 aurreratu da, baina bikote euskaldunak indar handiz erantzun du eta 12-11ra gerturatu da. Presioa Frantziaren aldera igaro da, eta une batez lehen seta galtzeko arriskuan egon dira. Azkenean, ordea, frantziarrek euren alde ixtea lortu dute: 15-12. Xuban eta Markelen lana eta elkar ulertzea funtsezko izan dira txapelketako faboritoari zailtasun handiak jartzeko.

Bigarren setean, Euskadik era ikusgarrian hasi du neurketa: 0-7 aurretik jarrita, pilota abiadura handiz eta kantxako toki desberdinetara bideratuta. Frantziak, ordea, ez du amore eman eta 7-11ra gerturatu da. Une horretan, erabakigarria izan den aldaketa egin dute: Halsouet kantxaratu dute, diziplina honetako etorkizuneko izarra izango den pilotari gaztea alegia. 

Honen sarrerak jokoaren erritmoa aldatu du erabat. Frantziak abiadura areagotu du eta 12-12ko berdinketara iritsi dira, trinketean tentsioa gorenera iritsiz. Partidua momentu garrantzitsuenean sartu da. Frantzia 14-13 aurreratu da, baina Xubanek egindako tanto ikusgarri bati esker, 14-14ko berdinketa lortu da. Hurrengo tantoan, sakea alde izanda, Halsouetek sake errestoan arriskatu egin du… eta asmatu. Frantziak 15-14ko emaitzarekin itxi du partida, eta hirugarren setetik kanpo utzi du askoz ere gehiago merezi izan duen euskal bikotea.

💡Ondorioa

Porrotak porrot, Lopetegi eta Mujikaren jarduna bikaina izan da, Euskadi, Xareko potentzia haundienaren aurka parez pare lehiatzeko gai dela erakutsiz. Izandako Jarrera, erakutsitako abiadura eta bien arteko elkar ulertzea zoragarria izan da eta oso sentsazio onak utzi dituzte ligaxkako hurrengo partidetarako, eta gehiago, seguruenik finalerdiak berriro Frantziaren aurkako jokatu beharko dutelako.